Ontmoet ons span

Ontmoet die bekendstellingspaneel:

Elsje van Jaarsveld

Elsje van Jaarsveld

Elsje van Jaarsveld is ’n dosent in Joernalistiek by Akademia en het ’n BCom-graad in Kommunikasie, asook ’n honneursgraad in Internasionale Markrisikobestuur, onderskeidelik aan die Noordwes-Universiteit en Unisa verwerf. Sy het haar loopbaan afgeskop in die korporatiewe bedryf as kommunikasiebestuurder, waarna die uitsaaiwese gewink het. Daarna het sy haar joernalistieke tande as nuusskrywer by eNuus vir KykNET en radiojoernalis by Pretoria FM geslyp. Tans staan sy deeltyds in die mediabedryf as radio- en televisie-aanbieder. Sy doseer die volgende modules: Joernalistiek, en Skryf en Redigeer vir die Media.

Jaco Gerrits

Jaco Gerrits

Jaco is een van Afrika se mees bekroonde tegnologie-entrepreneurs. International Business Magazine het hom onlangs aangewys as die top- jong presteerder van die jaar in die Suid-Afrikaanse tegnologiesektor, Finance Monthly het hom met die Game Changer-toekenning vir 2019 vereer en CEO Today Magazine het hom as een van die Top Global C-Level Executives geag.

Jaco is ook ’n voormalige wenner van die Top Technology Entrepreneur in Africa-toekenning en sy jongste waagstuk RoadSave – ’n veelbekroonde reddingstoep – ontvang voortdurend internasionale toejuiging. Hy glo dat dit moontlik is om goed te doen en terselfdertyd te presteer, waar ondernemingsgees en investering gebruik word as kragtige magte om goeie dinge te bereik. Dít het hom in staat gestel om The Venture South Africa – ’n wêreldwye soektog na die beste sosiale entrepreneurs – te wen, waar hy die voorreg gehad het om Suid-Afrika in New York te verteenwoordig teen 26 ander entrepreneurs.

Daniel Strauss

Daniel Strauss

Daniel Strauss (38) is ’n entrepreneur en waagkapitalis wat in klein-en mediumgrootte ondernemings belê om hulle te help om vinniger te groei. Hy is ’n makro-optimis en ’n mikro-realis, wat passievol is om welvaart te bevorder en daarvan hou om die volle potensiaal van mense uit verskillende vlakke van die samelewing te ontsluit – veral diegene wat besighede bou.

Hy het ’n B.Eng. (Bedryfsingenieurswese) en MBA aan dieUniversiteit van Stellenbosch verwerf. Dit is ook geen geheim dat hy mentorskap as ’n uiters belangrike deel van elke aspek van’n persoon se lewe beskou nie. Hy het aan Hoërskool Keimoes gematrikuleer en was ’n kranige rugbyspeler en atleet op universiteit. Hy woon tans in die Kaapse Wynlande saam met sy vrou, Rolene, en hulle twee seuns.

Dr. Rachel Maritz

Dr. Rachel Maritz

Dekaan: Fakulteit Ekonomiese en Bestuurswetenskappe

Dr. Rachel Maritz het in 2008 haar doktorsgraad in Ondernemingsbestuur (met spesialisasie in Strategiese Bestuur) aan die Universiteit van Pretoria (UP) behaal. Sy behaal ’n meestersgraad in Bedryfsleiding (MBL) aan Unisa (2001) en ’n meestersgraad in Mediakommunikasie (met lof) by UP, asook ’n BA-graad in Tale en honneursgraad in Afrikaans (met lof) by dieselfde instansie. Sy ontvang toekennings vir die beste doktorale proefskrif, meestersverhandeling en beste honneursstudent.

Rachel was vroeër vir sestien jaar voltyds verbonde aan die Universiteit van Pretoria se Departement Ondernemingsbestuur (Fakulteit Ekonomiese en Bestuurswetenskappe). Sy dien as hoof: onderrig en leer in hierdie departement, dien op die Fakulteitskomitee vir Onderrig en Leer, asook op die fakulteitstaakspan vir die fakulteit se internasionale akkreditasie. Tussen 1997 en 2001 was sy werksaam by Telkom as senior konsultant vir interne oudit en bestuurder: mededingende intelligensie.

Rachel het wye ervaring as ’n strategiekonsultant vir PWC, asook Enterprises UP, en was betrokke by strategieprojekte (onder andere die ontwikkeling, oudit en implementering van strategie) vir uiteenlopende maatskappye. Sy ontwikkel kursusse in strategie vir UP, die plaaslike bedryf, asook vir die internasionale MBA van die Guglielmo Marconi Universiteit in Rome. Sy tree op as studieleier vir meesters- en doktorale studente, asook as eksterne moderator en eksaminator vir programme, verhandelinge en proefskrifte aan ander universiteite. Sy is betrokke by die skryf van handboeke in strategiese bestuur en publiseer verskeie navorsingsartikels in internasionale vaktydskrifte. Haar navorsing fokus op ontplooiende en kreatiewe strategie, strategie in die praktyk, en korporatiewe bestuur.

Ontmoet die span agter die Entrepreneur van die Jaar-kompetisie :

Sanderien van der Walt

Sanderien van der Walt

Sanderien van der Walt, bestuurder van AfriForum Sakenetwerk, se hart klop warm vir veral entrepreneurs wat ondernemings begin het met geen finansiële steun nie en wat dit dan uitbou tot ’n sterk handelsmerk wat vertroue skep by hulle kliënte. Gewone mense wat soveel dryfkrag het om suksesvol te wees, inspireer haar.

Sy het Kommunikasie studeer aan die Universiteit van die Vrystaat en het ook die Gevorderde Diploma in Projekbestuur by Akademia voltooi.

Sy vertrou dat die platform wat AfriForum Sakenetwerk vir entrepreneurs skep van groot waarde is vir ondernemings en moedig alle entrepreneurs aan om van die geleenthede wat die platform skep, gebruik te maak.

Sy hou nog altyd van die woorde van Theodore Roosevelt wat sê: “Begin waar jy is. Gebruik wat jy het. Doen wat jy kan.”

Nikkie Kriel

Nikkie Kriel

Nikkie Kriel is ’n projekassistent by AfriForum Sakenetwerk. Sy studeer tans BCom Ondernemingsbestuur by Akademia. Sedert sy by AfriForum Sakenetwerk begin het, het sy agtergekom hoe om haar graad ook prakties aan te wend en dat mens nie noodwendig as ’n entrepreneur gebore word nie, maar dat jy dit kan ontwikkel – solank jy ’n passie daarvoor het, kan jy ook hard daarvoor werk.

Entrepreneurs is haar inspirasie en sy glo dat elke idee omskep kan word in ’n werklikheid ongeag die risiko wat geneem word.

Haar visie vir AfriForum Sakenetwerk is om entrepreneurs bymekaar te bring en ’n netwerk te skep waar hulp en ondersteuning die fokus is.

Mareli Swanepoel

Mareli Swanepoel

Mareli Swanepoel is bestuurder van die projekte-afdeling by Akademia en het ʼn BCom-graad in Kommunikasiebestuur aan die Noordwes-Universiteit verwerf, asook ’n honneursgraad in Kommunikasiebestuur aan die Universiteit van Pretoria. Mareli het haar Gevorderde Diploma in Projekbestuur by Akademia in 2018 voltooi. Sy het ondervinding in kommunikasiekunde, bemarking en projekbestuur by organisasies sonder winsoogmerk. Haar fokus is die implementering en uitbouing van bemarkings- en kommunikasieprojekte binne en buite dié organisasie.

Mari Ferreira

Mari Ferreira

Mari Ferreira is ’n projekkoördineerder by Akademia en het haar BCom-graad in Ondernemingsbestuur in 2019 by Akademia verwerf. Mari was vanaf 2016 tot 2018 ’n beursstudent en het haar internskap by Pretoria FM voltooi, waarna sy in Amerika gewerk het vir ’n jaar. Sy het ’n passie vir bemarking, projekbestuur en kommunikasie binne en buite die onderneming.

Lizán Maree

Lizán Maree

Lizán Maree is die bestuurder: studentewerwing by Akademia. Sy het haar MPhil in Hoër Onderwys in 2020 voltooi, wat haar passie vir bemarking en hoër onderwys kombineer. Haar betrokkenheid by die Entrepreneur van die Jaar-kompetisie gee haar ’n geleentheid om haar kennis, ervaring en passie vir bemarking terug te ploeg in die gemeenskap van entrepreneurs, wat weer op hulle beurt ’n verskil in ander gemeenskappe maak. Sy is opgewonde oor die opleidingsgeleenthede wat die kompetisie vir entrepreneurs bied, en vir die netwerke wat gevorm word deur die loop van die jaar. Sy bewonder entrepreneurs vir hulle deursettingsvermoë, aanpasbaarheid en vermoë om geleenthede aan te gryp.