Entrepreneurs móét risiko’s neem
Mark Zuckerberg, die tegnologie entrepreneur en mede-stigter van Facebook, se risiko’s het al telke male afbetaal, maar al sy projekte het nie noodwendig dieselfde winste opgelewer as sy beleggings in Instagram en WhatsApp nie. In 2014 het Zuckerberg $2 miljard in die virtuele-realiteitsmaatskappy, Oculus, belê. Selfs met virtuele realiteit wat al meer populêr geraak het, kon Facebook se virtuele realiteitsplatform nie met kompeteerders meeding nie. Kommentators het dié belegging as een van Zuckerberg se rare foute beskryf. Die media het gegons oor waarom dit nie gewerk het nie en hoe hy nie van beter kon weet nie.
Wat is risiko? Risiko is ’n kans wat jy waag met hulpbronne wat jy bereid is om te verloor, vir ’n opbrengs wat vir jou die moeite werd is. Die waarheid is egter dat Zuckerberg deurentyd berekende risiko’s neem. Dit beteken dat selfs al kry hy nie die opbrengs wat hy wou gehad het nie, is selfs die teleurstelling ’n groot genoeg leerskool dat dit die moeite werd is. Om berekende risiko’s te neem beteken om nooit soveel te verloor dat jy nie weer uit die as sal kan opstaan nie – en dat die opbrengs die risiko werd is.
Entrepreneurs móét risiko’s neem. Om te groei beteken om buite jou gemaksone te wees, maar wat is die tipiese risiko’s wat elke entrepreneur moet opweeg?
- Salaris prys gee
Om ’n maandelikse salaris op te offer vir die geleentheid om jou eie besigheid te bestuur, is ’n risiko wat min bereid is om te neem. ’n Berekende risiko is nie om jou werk te los as jy nie seker is dat jy genoegsame inkomste kan genereer nie. Minimaliseer jou risiko deur jou besigheid op die been te kry terwyl jy werk, spaar genoegsaam sodat jy tyd het om jou besigheid te groei en maak dan die sprong!
- Belegging in sleutel kliënte
Hoeveel tyd en hulpbronne moet jy aan ’n enkele groot kliënt spandeer? Dit kan maklik gebeur dat jy maande lank jou fokus op een projek of een kliënt hou net om teleurgestel te word. Dit is altyd ’n groot risiko vir enige besigheid om afhanklik te wees van net een of twee groot kliënte, maar besluit vooraf wat jy bereid is om te spandeer om ’n kliënt in die sakkie te kry. As dit te veel tyd van jou en jou werknemers verg, moenie saam gesleur word net om maande later te besef watter ander geleenthede jy verloor het nie.
- Opoffering van persoonlike kapitaal
Hoeveel van jou persoonlike kapitaal is jy bereid om aan jou besigheid te spandeer? En hoeveel daarvan moet jy eerder in ander beleggings sit? Moenie al jou eiers in een mandjie sit nie. Ongeag hoeveel jy in jou eie besigheid glo, is diversiteit steeds die beste manier om risiko te oorkom.
- Kontantvloei
’n Vraag waarmee meeste entrepreneurs worstel is die balans tussen positiewe kontantvloei en belegging in nuwe geleenthede. As jy ’n groeigeleentheid raaksien, moet jy veilig speel of die risiko loop om uit kontant uit te hardloop? Maak seker jou besigheid het ’n spaarplan waarmee jy kan woeker en moet nooit met jou huurgeld of salarisse dobbel nie!
- Vertroue in werknemers
Entrepreneurs wie se besighede begin vlam vat moet vinnig leer om te delegeer. Om verantwoordelikheid af te skuif beteken dat jy sleutel werknemers al meer gaan begin vertrou. Alhoewel delegasie kardinaal is vir groei, is die risiko daarin gesetel dat die dag-tot-dag funksionering van jou besigheid afhanklik is van enkele individue. Verminder jou risiko deur verskillende werknemers op te lei in dieselfde take, so verseker jy dat siekte, verlof of bedankings nie die appelkar omgooi nie.
- Persoonlike tyd en gesondheid
Die grootste opoffering wat entrepreneurs maak is dikwels tyd met hulle familie en hulle eie gesondheid. Dit is ’n belangrike kopskuif om te maak dat oefening en familietyd jou in die langtermyn meer produktief maak. Sekere projekte gaan vereis dat jy vir ’n tyd lank meer tyd by die kantoor as by die huis gaan spandeer. Die geheim is om ’n ritme te vind wat jou toelaat om soms deurnag te werk maar waar jy jouself tyd gun om saam jou geliefdes tyd te spandeer.
Die enigste strategie wat mislukking waarborg is om nooit risiko’s te neem nie. Beskerm jou lewenslyn, of dit kontantvloei, jou maandelikse inkomste of jou beste werknemers is – dan kan jy met gemoedsrus jou volgende wilde perd opsaal!