POPIA se afsnydatum is 21 Julie 2021 – Voldoen jou onderneming aan die verpligtinge soos in POPIA uiteengesit?
Deur Inge Labuschagne
Voldoen jou onderneming aan die vereistes soos uiteengesit in die Wet op die Beskerming van Persoonlike Inligting (Engels: Protection of Personal Information Act, oftewel POPIA)?
POPIA bevorder die beskerming van alle persoonlike inligting van privaat persone wat deur openbare en privaat instansies versamel en verwerk word, en bied riglyne wat die reg op privaatheid teenoor ander regte, soos toegang tot informasie, help balanseer.
Die bepalings van POPIA is van toepassing op elke persoon of onderneming wat persoonlike inligting verwerk (soos byvoorbeeld name, vanne, identiteitsnommers, telefoonnommers, e-posse of adresse). Indien jou onderneming inligting oor werknemers, kliënte en/of verskaffers bewaar, moet jy aan POPIA voldoen.
Neem ons vinnige en basiese POPIA-risiko-assessering om vas te stel of jy voldoende maatstawwe in plek het om te verseker dat jy aan POPIA voldoen:
- Het jou onderneming ’n handleiding op jou aanlyn platforms wat klante in kennis stel van hul regte ingevolge POPIA?
- Het jou onderneming ’n handleiding vir interne nakomingsprotokol oor hoe om persoonlike inligting te versamel, te stoor en te verwerk?
- Het jy voorsorgmaatreëls in plek om die wettige verwerking van kinders se persoonlike inligting te verseker?
- Het jou onderneming maatstawwe in plek om die wettige verwerking van spesiale persoonlike inligting te verseker?
- Het jy ’n opgeleide inligtingsbeampte wat by die Inligtingsreguleerder geregistreer is?
- Het jou onderneming die regte beleid in plek vir die versameling, stoor, vrystelling en uitvee van persoonlike inligting?
- Het jou onderneming ’n stelsel in plek om vooraf magtiging/toestemming te bekom?
- Is jou personeel opgelei in die hantering van navrae rakende databeskerming en weet hulle wanneer hulle persoonlike inligting bekend mag maak of nie?
- Maak jou dienskontrakte voorsiening daarvoor dat werknemers hul toestemming moet verleen vir die verwerking van hul persoonlike inligting?
- Het jy ’n aksieplan in plek in die geval waar data uitgegee is sonder toestemming?
Indien jy “nee” op enige van hierdie vrae geantwoord het, loop jy die risiko van ’n boete van tot R10 miljoen of moontlike gevangenisstraf van tot tien jaar, asook die instelling van siviele aksie deur die Inligtingsreguleerder namens die data-onderwerp. Die nienakoming is nie opsioneel nie.
Moenie POPIA ignoreer nie; dit gaan nie net verdwyn nie. Moet dus nie jou nakomingspogings probeer uitstel nie.
Kontak ons vandag nog om te reël vir ’n POPIA-nakomingsbeoordeling en hulp deur regslui om seker te maak dat jy en jou onderneming POPIA-gereed is.